Tuesday, June 12, 2012

မဇ္ဈိမပဏ္ဏာသပါဠိတော်မြန်မာပြန် ဗောဓိမင်းသားသုတ်တော်မှ

မင်းသား - ငါသည်ညဥ့်၏ နောက်ဆုံးဖြစ်သော မိုးသောက်ယံ၌ သုံးခုမြောက် ဤအသိဥာဏ်၊ ၀ိဇ္ဇာ(အာသ၀က္ခယဥာဏ်)ကို ရခဲ့ပြီ။ မသိမှု အ၀ိဇ္ဇာပျောက်ခဲ့ပြီ။ အသိဥာဏ်ဝိဇ္ဇာဖြစ်ပေါ်ခဲ့ပြီ။ အမှောင်ပျောက်ခဲ့ပြီ။ ဥာဏ်အလင်းရောင် ဖြစ်ပေါ်ခဲ့ပြီ။ မင်းသား - ထိုငါ့အား ဤသို့သော အကြံ(စဉ်းစားမှု)သည် ဖြစ်၏။

ငါသိအပ်သော ဤတရားကားနက်နဲ၏။ မြင်နိုင်ခဲ၏။ မွန်မြတ်၏။ တက္ကီပုဂ္ဂိုလ်တို့၏ ကျက်စားရာ မဟုတ်။
သိမ်မွေ့၏။ ပညာရှိသူတို့သာ သိမြင်နိုင်၏။ ဤသတ္တ၀ါများကား ကာမဂုဏ်တို့၌ မွေ့လျော်ကုန်၏။ ကာမဂုဏ်တို့၌ ပျော်ပိုက်ကုန်၏။ ကာမဂုဏ်တို့၌ အလွန်နှစ်ခြိုက်ကြကုန်၏။ ကာမဂုဏ်တို့၌ မွေ့လျော်ပျော်ပိုက် အလွန်နှစ်ခြိုက်နေကြသော ဤသတ္တ၀ါများသည် အကျိုးတို့၏ အကြောင်းတရားဖြစ်သော ဤပဋိစ္စသမုပါဒ်တရားကို မြင်နိုင်ရန်ခက်ခဲ၏။

ပြုပြင်မှု(သင်္ခါရ) အားလုံး၏ ငြိမ်းရာ၊ ဥပဓိတရားအားလုံးကို ပယ်စွန့်ရာ၊ တဏှာ၏ကုန်ရာ၊ ရာဂ၏ ကင်းရာ ချုပ်ရာ ငြိမ်းရာဖြစ်သော ဤနိဗ္ဗာန်တရားကိုလည်း မြင်နိုင်ရန် ခက်ခဲ၏။ ငါသည် တရားကို ဟောသော်ငြားလည်း သူတစ်ပါးတို့သည် ငါဟောသော တရားကို မသိနိုင် နားမလည်နိုင်ရာ။ ဤသို့ဖြစ်လျှင် ထိုတရားဟောပြောမှုသည် ငါ့အား ပင်ပန်းရုံသာ ဖြစ်ရာ၏။ ငါ့ကိုယ်ကိုညှင်းဆဲရုံသာ ဖြစ်ရာ၏။ဟုစိတ်တွင် ဖြစ်ပေါ်ခဲ့၏။ မင်းသား - ထို့အပြင် အလွန်အံ့သြ ဖွယ်ဖြစ်သော ရှေးက မကြားဘူးသော ဤဂါထာတို့သည် ငါ၏စိတ်တွင် ထင်လာကုန်၏။

ငါသည် ခဲယဉ်းစွာ ကျင့်၍ သိအပ်ပြီးသော တရားကို ယခုအချိန်အခါတွင် ဟောပြောခြင်းငှာ မသင့်လျော်သေးချေ။ ရာဂဒေါသတို့ အနှိပ်စက်ခံနေကြရသော သူတို့သည် ဤတရားကို လွယ်ကူစွာ သိနားလည်နိုင်ကြမည်မဟုတ်ချေ။ အမှောင်ဖုံးလွှမ်း လျက်- ရာဂတပ်စွဲနေသော သူတို့သည် သိမ်မွေ့နက်နဲ၍ အနုမြူသဖွယ် မြင်နိုင်ခဲသော (သံသရာ၏) အဆန်တရားကို မြင်နိုင်ကြမည် မဟုတ်ချေ။

No comments:

Post a Comment