Monday, March 5, 2012

ဗုဒ္ဓတရား အတိုင်းသာ

လူ့လောကမှာလူရယ်လို့ဖြစ်လာကြရင် လူမှုရေး၊ စီးပွားရေး၊ ကျန်းမာရေး၊ ပညာရေး၊ နိုင်ငံရေး၊ ဘာသာရေးအစရှိတဲ့ အရေးတွေ ကို လူသားတိုင်းမလွှဲမရှောင်သာ ရင်ဆိုင်ကြရမှာပါ။ ဒီအရေးတွေအားလုံးထဲမှာ ဘာသာရေးကလွဲရင် ကျန်အရေးတွေအားလုံးဟာ နှစ်ဦးနှစ်ဖက်အများနဲ့ ဆက်ဆံလုပ်ကိုင်ကြရတဲ့ အရာတွေပါ။ ဗုဒ္ဓဘာသာ၊ ဘာသာရေးက တော့ ကိုယ့်ရဲ့စိတ်ကိုဖြူစင်သန့်ရှင်းတည်ငြိမ် အေးချမ်းပြီး ပရမတ်တို့ရဲ့သဘောသဘာဝ အမှန်ကို အမှန်အတိုင်းသိမြင်အောင် အဲဒီ ရုပ်၊ နာမ်၊ ခန္ဓာ၊ ပရမတ်တို့ရဲ့ အနိစ္စ၊ ဒုက္ခ၊ အနတ္တ လက္ခဏာ၃ပါးမှတစ်ဆင့် သစ္စာ ၄ပါးကို ထိုးထွင်းသိမြင်အောင် ကျင့်ကြံရတာဖြစ်လေတော့ကိုယ့် စိတ်ကိုကိုယ့်ဘာသာကိုယ် တစ်ဦးတည်း ကျင့်ကြံရတဲ့အလုပ်ပါ။  ဒီတော့ဗုဒ္ဓဘာသာဝင် မြန်မာလူမျိုး အတော်များများဟာ ဘာသာရေးကို ဘုရားပေါ်ရောက်မှ၊ ဘုန်း ကြီးကျောင်းရောက်မှ၊ တရား ရိပ်သာရောက်မှ လုပ်ရ
တဲ့ အလုပ်လို့ တလွဲခံယူထားကြပြီး တခြားအရေးတွေ လုပ်ကိုင်စဉ်မှာ ဘာသာရေး ကို ဘေးချိတ်ထားလေ့ရှိကြ ပါတယ်။
ဗုဒ္ဓမြတ်စွာဘုရား ၄၅ ဝါ ပတ်လုံး လောကသားတွေကို မနားမနေဟောကြားခဲ့တဲ့ တရားတော်တွေရဲ့ အနှစ်ချုပ်ကတော့ ”မကောင်းမှုရှောင်၊ကောင်းမှုဆောင်၊ ဖြူအောင်စိတ်ကိုထား” ဆိုပြီး၃ချက်တည်းပါ။
မြတ်စွာဘုရားက ဦးဇင်းတို့လူသားတွေ ရှောင်ကြဉ်ရမယ့် အကုသိုလ်ဒုစရိုက်တွေကို ကာယဒုစရိုက် ၃ပါး၊ (သူတစ်ပါး အသက်သတ်ခြင်း၊ သူတစ်ပါးဥစ္စာကို မတရားရယူခြင်း၊ သူတစ်ပါးအိမ်ရာကို ပြစ်မှားခြင်း)၊ ဝစီ ဒုစရိုက် ၄ ပါး(လိမ်ညာပြောဆိုခြင်း၊ ကြမ်းတမ်းစွာ ဆဲဆိုခြင်း၊ ကုန်းချောစကားပြောခြင်း၊ သိမ်ဖျင်းယုတ်ညံ့သော စကားကိုပြောခြင်း)၊ မနောဒုစရိုက် ၃ပါး (သူတစ်ပါးပစ္စည်းကို မတရားလိုချင်ခြင်း(လောဘ)၊ သူတစ်ပါးကို ပျက်စီးစေလိုခြင်း(ဒေါသ)၊ အယူလွဲမှားခြင်း (မောဟ)ဆိုပြီး ‘၁ဝ’ပါးတိတိကျကျဟောကြား ပေးခဲ့ပါတယ်။
ကမ္ဘာစောင့်သီလဖြစ်တဲ့လူမျိုးနွယ်စောင့် သီလဖြစ်တဲ့ ၅ ပါးသီလဟာ ကိုယ့်ကြောင့် တစ်ပါးသူတွေ ဒုက္ခမရောက်အောင် စောင့်ထိန်းရတဲ့လူ့ကျင့်ဝတ်ပါ။ သူတစ်ပါး အသက်ကို သတ်ခွင့်ကြုံလာတိုင်း၊ သူတစ်ပါးဥစ္စာကို မတရားရယူခွင့်ကြုံလာတိုင်း၊ သူတစ်ပါးသား မယားကို ပြစ်မှားခွင့်ကြုံလာတိုင်း၊ သူတစ်ပါး ကို လိမ်ညာပြောဖို့ကြုံလာတိုင်း အဲဒီကာယ၊ ဝစီဒုစရိုက်တွေကို မကျူးလွန်ဖြစ်အောင် မိမိ ကိုယ်ကိုယ် သတိထားစောင့်ထိန်းခြင်းဟာ လူဆိုတဲ့သတ္တဝါကို၊ အခြားသော တိရစ္ဆာန်ဆိုတဲ့ သတ္တဝါထက် မြင့်မြတ်အောင် ပိုင်းခြား မြှင့်တင်ပေးထားတဲ့ လူကျင့်ဝတ်တွေပါ။ အရက် သောက်လိုက်လို့ သတိ၊ အသိဥာဏ်တွေ မေ့လျော့ ချို့ယွင်းသွားခဲ့ရင် ပုထုဇဉ်တိုင်းမှာ အနုသယကိလေသာ အဖြစ်ကိန်းနေတဲ့ မနောဒု စရိုက် ၃ ပါးကို ထိန်းချုပ်နိုင်စွမ်း မရှိတော့ဘဲ ကာယဒုစရိုက်၊ ဝစီဒုစရိုက်တွေအထိ ကျူးလွန်တတ်ကြလို့ အရက်သောက်ခြင်းဟာ အကုသိုလ်ဒုစရိုက်မှာ မပါဝင်ပေမယ့် ၅ ပါးသီလထဲမှာ ထည့်ထားတာပါ။
မြတ်စွာဘုရားအလိုတော်အားဖြင့် ဦးဇင်းတို့ဟာ မကောင်းမှု အကုသိုလ်ဒုစရိုက်တွေကို ရှောင်ကြဉ်တဲ့ ဝါရိတ္တသီလကိုစောင့်ထိန်းရုံနဲ့ မလုံလောက်ပါဘူး။ ကောင်းမှုကုသိုလ် လောကကောင်းကျိုး ပရဟိတလုပ်ငန်းများ ကိုပြုလုပ်ခြင်းဆိုတဲ့ စာရိတ္တသီလကိုပါ ဖြည့်ကျင့်ပါမှ သီလကို တင်းပြည့်ကျပ်ပြည့် စောင့်ထိန်းရာ ရောက်ပါတယ်။
မြတ်စွာဘုရား အဆုံးအမအတိုင်း မကောင်းမှုအကုသိုလ်ဒုစရိုက်တွေကို ရှောင်ကြဉ်ပြီး ကောင်းမှုကုသိုလ် အများကောင်းကျိုး ပရဟိတအလုပ်တွေကို လုပ်ကိုင်ကြလို့ အကြောင်းအကျိုးနိယာမအရ ကောင်းကျိုး တရားတွေ ရရှိလာချိန်မှာ လောကရှိ အကျိုးတရားတိုင်းဟာ အကြောင်းတရားနဲ့ မကင်းဘူးဆိုတာကို နားလည် သဘောပေါက်တဲ့ ပစ္စယပရိဂ္ဂဟဥာဏ်သာ မရှိခဲ့ရင် စိတ်ကိုဖြူ အောင်ထားနိုင်ဖို့က ခက်ပြန်ရော။
ပစ္စယပရိဂ္ဂဟဥာဏ်ဟာ ပုထုဇဉ်လူ သားတိုင်းမက်မောတဲ့ လာဘ်လာဘပေါများခြင်း၊ လူအများက မြတ်နိုးကြည်ညိုလေးစားခြင်း၊ လောကမှာထင်ပေါ် ကျော်ကြားခြင်းဆိုတဲ့ ကောင်းကျိုးနဲ့ တွေ့ကြုံရရင် ဒါတွေ ကို အကြောင်းကောင်းတွေ လုပ်လို့ ဖြစ်ထွန်းလာတဲ့ အကျိုးကောင်း လောကဓံတွေအဖြစ် ဆင်ခြင်သိမြင် နိုင်လို့ ငါ၊ ငါ့ဥစ္စာဆိုပြီး လောဘမတက်အောင် ဆင်ခြင်နိုင်စွမ်းရှိပါတယ်။
ဖြူစင်မြင့်မြတ်တဲ့၊ စွန့်လွှတ်အနစ်နာခံတဲ့ကုသိုလ် စိတ်ကိုအခြေပြုပြီး ကုသိုလ်ကောင်းမှု၊ လောကအကျိုးတွေ ပြုလုပ်ရင်းက ရရှိလာတဲ့ ဒီလောဘ၊သက္ကာယ၊သိလော ကတို့ကြောင့် ကိုယ့်ရဲ့စိတ်တွေဟာ ပြန်လည်ညစ်နွမ်း သွားရမယ်ဆိုရင်တကယ် နှမြောဖို့ကောင်းပါတယ်။ (တကယ်တော့ လောက မှာရရှိလာကြတဲ့ ကောင်းကျိုးတရားတွေအားလုံး၊ တိုက်ခိုက်လာကြတဲ့ ဆိုးကျိုးတရားတွေ အားလုံးကြောင့်ကိုယ့်ရဲ့စိတ်မှာလောဘ၊ဒေါသ စေတသိက်တွေ ခြယ်လှယ်ခွင့်မရအောင် သတိပဋ္ဌာန်တရားနဲ့ ဆင်ခြင်နေထိုင်ခြင်းဟာ စိတ်ကိုဖြူအောင်ထားနေခြင်းသာဖြစ်ပါတယ်) အကုသိုလ်ဒုစရိုက် ၁ဝ ပါးမကောင်းမှု တရားများကို ရှောင်ကြဉ်ခြင်း၊ မင်္ဂလသုတ်ပါ ၃၈ ဖြာသော ကောင်းမှုတရားများ၊ မေတ္တာသုတ်ပါ ၁၅ ပါးသော ကောင်းမှုကိုယ်ကျင့်တရားများ၊ လောကကောင်းကျိုးပရဟိတလုပ်ငန်းများကို ကျင့်ကြံလုပ်ကိုင်ခြင်း၊ ကိုယ့်ဘဝမှာ တွေ့ကြုံလာရတဲ့အကောင်းအဆိုး လောကဓံအားလုံးကို အကြောင်းအကျိုးများအဖြစ် သတိပညာ နဲ့ ဆင်ခြင်နေခြင်းဟာ မြတ်စွာဘုရားရဲ့ ဒေသနာနဲ့အညီ ကျင့်ကြံနေထိုင်ကြခြင်းသာ ဖြစ်ပါတယ်။
နိဂုံးချုပ်အနေနဲ့ ဦးဇင်းပြောချင်တာကတော့ လူ့လောကကြီးမှာ ဦးဇင်းတို့မဖြစ်မနေ လုပ်ကိုင်နေကြရတဲ့ အရေးတွေအားလုံးကို မြတ်စွာဘုရားရဲ့တရားဓမ္မ၊ ဘာသာရေးနဲ့ တွဲဖက်ပြီး လုပ်ကိုင်ကြရမယ်ဆိုတာပါပဲလို့ ဆန္ဒပြု ရင်း ...သာသနာအကျိုး လောကအကျိုးဆောင်ရွက်နိုင်ကြပါစေ ။

No comments:

Post a Comment