Wednesday, May 4, 2011

ငြိမ်းချမ်းစွာနေမယ်......၊

ကျွန်တော်ငယ်စဉ်ဘ၀မှာ ည ရောက်ပြီဆိုင်လျှင် အဖိုးဆီသွား၍ နင်းပေးလေ့ရှိသည်။ ပြီးလျှင် အဖိုးမှ ပုံပြင်တွေ ပြောပြကာ မုန့်ဖိုးပေးလေ့ရှိပါသည်။ ပုံပြင်ဆိုရာတွင် ငယ်စဉ်က ထင်ခဲ့သောအတွေးရယ်ပါ။ တစ်ကယ်တန်းတော့ ဘုရားဟော ဇာတ်တော်များပင်ဖြစ်သည်။ ကျွန်တော်သည် အဖိုးကိုမြင်တိုင့်း အသက်ရှည်ပြီး အဖိုးဘ၀ဟာ အေးချမ်းနေသလို ငြိမ်းချမ်းနေသလို ခဏခဏ ခံစားမိပါသည်။ အဖိုးအနားမှာ နေရသည်ပင် အေးချမ်းသလို ခံစားမိသည်။ ကျွန်တော်တို့ မိသားစုဆွေမျိုးသားချင်းများမှာ သာမာန် ယာလုပ်ငန်းဖြင့် အသက်မွေးကြသည်။ ရာထူး၊ ဥစ္စာ၊ အာဏာရယ်လို့လည်း ဘာမျှပင် မရှိခဲ့။ ပကတိ အညာတောသူ တောင်သားများပင် ဖြစ်ကြသည်။ အဖိုးကို နင်းပေးပြီးတစ်နေ့တော့ အဖိုးသည် ကျွန်တော့်ကို မေးခွန်းတစ်ခု မေးခဲ့ပါသည်။

အဘိုး။ ။ ငါ့မြေး ဘ၀မှာ ဘယ်လိုနေသွားချင်သလဲ။

ကျွန်တော်။ ။ စိတ်ချမ်းသာစွာနဲ့ ပျော်ပျော်ရွှင်ရွှင် နေသွားချင်တယ်အဘိုး။ အဘိုးတို့လိုပေါ့။

အဘိုး။ ။ စိတ်ချမ်းသာခြင်းနဲ့ ပျော်ရွှင်ခြင်းဆိုတာ မတူဘူး မြေးငယ်။ စိတ်ချမ်းသာခြင်းကို ခန္ဓာကိုယ်က ရှာရတာ။ ပျော်ရွှင်ခြင်းဆိုတာတွေက အပြင်ကလာတာ။ အဘိုးက ပျော်ရွှင်ခြင်းကို မစွဲလမ်းပဲနဲ့ ခန္ဓာကိုယ်က စိတ်ချမ်းသာခြင်းကို ရှာတာ။ ပျော်ရွှင်ခြင်းဆိုတာက စိတ်မှာ ကိလေသာ အညစ်အကြေးတွေ စွန်းထင်းပေရစ်ခဲ့လို့ပဲ။ ကြာရင် လက်နှီးဝတ်လိုပဲ မည်းညစ်လာတယ်။ နောက်ဆုံးတော့ စွန့်ပြစ်ခြင်းကို ခံရပြီးတော့ အသုံးမ၀င်တော့ဘူး။ ပျော်ရွှင်ခြင်းကနေ ရလာတဲ့ လောဘတွေ၊ မာနတွေ၊ ဒိဋ္ဌိတွေဟာ သံသရာကို ရှည်စေလို့ပဲ။ ပျော်ရွှင်ခြင်းကနေ ဖြစ်လာမယ့် ဒီတရားတွေကို ပယ်ပြီးတော့ ခန္ဓာကိုယ်က စိတ်ချမ်းသာခြင်းကို ရှာရမယ်။ လက်နှီးဝတ်ကို ခဏခဏ ရှော်ဖွတ်ရသလိုပေါ့။ စိတ်အစဉ်မှာ ဖြစ်လာတဲ့ ကိလေသာနီဝရဏတရားကို ဘ၀နာတရားနဲ့ သတိအစဉ် ဉာဏ်ဝင်ပြီးတော့ ပယ်ရမှာပဲ။ ဒိဋ္ဌဓမ္မ သုခ၀ိဟာရ - စိတ်အေးချမ်းစွာ နေလို၍ တရားရှုမှတ်ပွားများတာပေါ့။ မြေးလေး ကြီးလာရင် သတိထားရမယ့် အချက်တွေ ထပ်ပြောဦးမယ်။ လာဘ သက္ကာယ သိလောက- လာဘ်လာဘရယ်၊ အရိုအသေပေးခံရခြင်းရယ်၊ ကျော်ကြားခြင်း ဆိုတာပဲ။ ဒီအရာတွေဟာ တစ်ကယ်ဆန်းစစ်ကြည့်ရင် မာန်နတ်ရဲ့စစ်တပ်နဲ့တူတယ်။ အပါယ်ကို တွန်းချနေတာပေါ့။ နောက်ထပ်က ရာထူး အာဏာ စည်းစိမ်ဥစ္စာ မြင့်လာလေလေ ဒုက္ခကြီးလေလေ၊ မဟာပုညော အတိဒုက္ခော- ဘုန်းကြီးလာလျှင်လည်း ဒုက္ခကြီးတယ်။ သူတို့ရဲ့ဆန့်ကျင်ဘက် အရိယတို့မှာကျတော့ အထက်မဂ်ရောက်လေ ငြိမ်းချမ်းလေပဲ။ လာဘ်လာဘတွေ၊ ကျော်ကြားခြင်းတွေ၊ ဘုန်းကြီးလာတွေက အတိတ်ဘ၀က ပြုခဲ့ဘူးတဲ့ ကုသိုလ်ကံတွေကြောင့်လည်းဆိုင်သလို လက်ရှိ ဉာဏ်ပညာနဲ့ ၀ီရိယ အပေါ်မှာလည်း မူတည်နေတယ်။ မြေးကို ပြောပြဖူးတဲ့ လောကရဲ့ဖန်ဆင်းရှင်သုံးဦးဖြစ်တဲ့ ကံ၊ ဉာဏ်၊ ၀ီရိယနဲ့ ကံကံ၏အကျိုးကိုတော့ အဘိုးထပ်ရှင်းပြ စရာ မလိုလောက်တော့ဘူး။ ဘ၀မှာ ငြိမ်းချမ်းစွာ နေချင်တယ်ဆိုရင်တော့ လူ့ပြည်မှာ တန်ဖိုးအရှိဆုံးဖြစ်တဲ့ သဒ္ဓါတရားကိုခိုင်မြဲအောင်ကြိုးစားပြီး ဘုရားရှင်ရဲ့အဆုံးအမတွေကို လိုက်နာရမယ်။ ဗုဒ္ဓရဲ့အဆုံးအမ အသိပညာ၊ လောကသိပ္ပံအတတ်ပညာတွေကို ရှာဖွေရမယ်။ အတတ်ပညာတစ်ခုတည်းနဲ့ လောကကို မတည်ဆောက် နိုင်သလို အသိပညာတစ်ခုတည်းနဲ့လည်း လောကကို အလှမဆင်နိုင်ဘူး။ မရဏဆိုတဲ့ သေခြင်းတရားကလည်း အချိန်မရွေး နေရာမရွေး ကျရောက်နိုင်တာဖြစ်လို့ အရွယ်သုံးပါးရယ်လို့ ခွဲမနေဘဲ ဗုဒ္ဓရဲ့တရားတွေကို ကျင့်ကြံအားထုတ်ရမယ်။ သီလတရားတွေကိုလည်း လုံခြုံအောင် စောင့်ထိန်းရမယ်။ သီလမရှိရင် အသက် မရှိတာနဲ့ တူတူပဲ။ အလွယ်ဆုံးမှတ်မယ်ဆိုရင် မြေးရယ်။ တရားနဲ့နေရင် သေရဲပါတယ်။ နေ့စဉ်နေ့တိုင်းမှာလည်း ကောင်းမှုကုသိုလ်ဆိုတဲ့ ရေ ဘယ်နှစ်ပုံးလောင်းပြီးပြီလဲ မကြည့်နဲ့ ကိလေသာ မီး ဘယ်လောက် ငြိမ်းပြီးပြီဆိုတာကို အရင် စစ်ဆေးပါ။ ဒါဆိုရင် ဘ၀မှာ ငြိမ်းချမ်းစွာ နေတတ်လာလိမ့်မယ။် မြေးလေးတော့ ပျင်းနေပြီလား မသိဘူး။ ငါ့မြေးလေးလည်း မပျင်းရအောင် အဘိုးရှေ့ကတိုင်ပေးတာလေးကို အလွတ်ရအောင် ကျက်။

သီလပြည့်စေ အိနြေ္ဒစိုးပိုင် ဗောဇ္ဈင်တိုင်သည့် နိုးကြားဘိ၍ သတိသမ္ပဇ္ဈင် စိတ်ငြိမ်ဝင်လော့ ကိုယ်ကိုဖြောင့်မတ် သတိကပ်လျက် ပေါ်လန့်ဥပါဒါနက္ခန္ဓာ ရုပ်နှင့်နာမ်ကို ကြိမ်ဖန်များစွာ ရှုပွားပါ၍ ဖြစ်ပေါ်လာငြား ဉာဏ်ထူးများကြောင့် လေးထွေအောဂ လေးရောဂတို့ ကင်းပရာမှန် နန်းနိဗ္ဗာန်ကို မှန်စွာမသွေ ရောင်ပါစေသော် ရောက်စေသော်…..

အဘိုးဆီက မုန့်ဖိုးထပ်လိုချင်ရင်တော့ နောက်ထပ်တစ်ပုဒ်ထပ်ကြည့်ဦး မြေးလေး။

မရဏကိစ္စ ဤဓမ္မက တစ်မြို့တစ်ရွာ တစ်အိမ်ရာ၌ တသီးတသန့် တကန့်ခြား၍ ပြန်ကြားတတ်သည် မဟုတ်ချေ ဘူး မြို့တိုင်းရွာတိုင်း နေရာတိုင်း၌ မဆိုင်းတတ်လွှာ သေတတ်ကြသည် ခန္ဓာအနိစ္စပါတကား…..

ဒီတရားတွေကို တရားအသိဉာဏ်ရင့်သန်လာသည်နှင့်အမျှ ဆင်ခြင်ပွားများပါ။ ငွေကြေးအမွေထက် ဒီတရား တွေရဲ့ အမွေအနှစ်ကို ပိုပြီးတန်ဖိုးကြီးတယ်ဆိုတာ ငါ့မြေးသိလာပါလိမ့်မယ်။ ဖြစ်ပြီး ပျက်နေတဲ့ သံသရာကြီးမှာ ပုံပန်းလှသည်ဖြစ်စေ၊ မလှသည်ဖြစ်စေ၊ ကြီးကြီးငယ်ငယ်၊ ရွယ်ရွယ်လတ်လတ် ယုတ်မြတ်မဟူ ရှင်လူရဟန်း တို့ဟာ မသေခင်ချစ်လိုက်ကြ သေလျှင်တော့ ပစ်လုက်ကြတဲ့ ဤခန္ဓာ၊ မသေလျှင်တော့ ဟုတ်တုတ်တုတ် သေလျှင်ပုတ်တတ်တဲ့ ဤခန္ဓာကြီးဟာ သေဖို့ချိန်ခါရောက်လာရင်တော့ သေကြရမည်မလွဲဧကန်ဆိုတာ ဆင်ခြင် ပွားများရင်း ဘ၀မှာ ငြိမ်းချမ်းစွာ နေထိုင်နိုင်အောင် ကြိုးစားသွားပါ။

အဘိုး၏ တစ်ရက်တာ တရားစကားများမှာ ဤသို့ပင်ဖြစ်သည်။ ထိုသို့ မှာကြားသွားသော အဘိုး၏ မှာကြားချက်များအား ခေတ်လူငယ်တို့ မှတ်သားပွားများပြီး တကယ်စင်စစ် ဘ၀မှာ ငြိမ်းချမ်းစွာ နေထိုင်နိုင်ကြပါစေ…..

No comments:

Post a Comment